MEDVEGJASIT, ZËRI MË I FUQISHËM I TROJEVE TONA

MEDVEGJASIT, ZËRI MË I FUQISHËM I TROJEVE TONA

Shkruan: Shaban CAKOLLI

Gjermani,9 prill 2011(medvegja.net)

Ka kohë që te të rinjtë medvegjas është shtuar një dëshirë e zjarrtë për një punë të përkushtuar në favor të këtyre trojeve, të shfaqin pikëpamjet të atyre qindra-mijëra shqiptarëve që mendonin për çështjen kombëtare dhe çështje tjera të rëndësishme për të sotmen dhe të ardhmen e kombit tonë.

Nisma më e mirë e këtyre të rinjve është nxjerrja e kësaj reviste informative, edhe pse është një punë e vështirë, e cila kërkon, jo vetëm përgatitje serioze intelektuale e teorike,
por edhe përvojë në këtë zanat. Kjo rrugë ishte praktikuar qysh më herët, duke u dhënë mund dhe kohë deri sa e pa dritën numri i parë i kësaj reviste.

Kjo revistë tani lirisht mund të themi se mund të quhet edhe “qëndresa” e këtyre trojeve. Të jesh qëndresë e një populli të ndarë padrejtësisht, të shtypur e të copëtuar, të ndrydhur e të mashtruar, e një populli të cilin mundohen ta shtrëngojnë për të heshtur, për ta mbyllur kaptinën e fjalës së drejtë e të guximshme domethënë shumë. Kjo rini medvegjase që e mban të ndezur zjarrin e dashurisë për atdheun, kombin e arsimin, pavarësisht shtrëngimeve, nuk është dorëzuar as nuk e ka ndërmend të dorëzohet. Revista që tani po shfletohet nga duart tuaja e ka fizionominë e dëshiruar.

Ajo nuk do t’i ndalë përpjekjet për ta nxjerrë të vërtetën në shesh, për ta mbrojtur integritetin tuaj kombëtar e njerëzor.

Ajo do të kultivojë me sukses mendimin tuaj të lirë, përparimtar, shkencor dhe mbarëshqiptar, andaj si e tillë kjo revistë duhet të qëndrojë. Prandaj, vëllezër dhe motra, ne u thërrasim të gjithëve që ta mbështetni këtë revistë, sepse
pa mbështetjen tuaj nuk mund ta arrijë objektivin e vet.

Format e mbështetjes suaj janë të nduarnduarshme; ju mund ta ndihmoni materialisht e moralisht, duke i ofruar shkrimet tuaja, mendimet tuaja përparimtare e shkencore,
e deri te shpërndarja e saj.

Duke e ndihmuar revistën tuaj, ju e ndihmoni vendin tuaj nga çdo formë e dhunës, qëndroni edhe ju me të në vijën e parë të frontit, për një jetë më të mirë, për drejtësi e demokraci. Duke e ndihmuar revistën tuaj, ju inkuadroheni direkt në shprehjen e fjalës suaj të fuqishme, inkuadroheni në Lëvizjen Kombëtare, bëheni luftëtarë të pakompromis në mbrojtjen e saj.
Pra, revista juaj është zëdhënësja juaj më e fuqishme që mbron integritetin tuaj kombëtar, intelektual dhe njerëzor. Urime!/Zëri i Medvegjës/