NË TOKË TË BABËS, E TË GJYSHIT-Reagim Medvegja Forum

Reagim në shkrimin “Si n’tokë t’babës”, i autorit Muharrem Nitaj, i publikuar nëpër disa media të shkruara dhe elektronike (Koha Ditore), më 5 korrik

Në tokë të babës, e të gjyshit

Burrat dhe trimat e Preshevës, Medvegjës e Bujanocit janë burra shqiptarë, bile shumë më shqiptarë sesa një njeri me ide të çmendura, i cili merr guximin ta shan vëllanë e tij, në shtëpinë e tij.
Kohëve të fundit, si me i pas porositë vet Millosheviqi (shpirti iu djegtë në ferr), disa “trima gazëtarë, e kinse shqiptarë” po shpikin ide të paimagjinueshme, vetëm e vetëm për t’ia blerë vetes një çik famë. I tillë ishte shkrimi i Muharrem Nitaj “Si n’tokë t’babës”, shkrim ky i cili jo vetëm që ndjell urrejtje ndër-vllazërore, por edhe e zbraz vrerin nga shpirti i sëmurë, i mbushur me halucinacione.
Po, ashtu është. Halucinacione janë ato që i sheh, e që nuk janë të vërteta. Halucinacione janë dyshimet se Kosovën kinse po e blejkan Preshevarët, për të mos i lënë “kosovarët” në Kosovë.

Çfarë turpi.

Si është e mundur që dikush të bëjë ndarje të tilla midis shqiptarëve. E sidomos është çudi kur kjo vjen nga një shqipfolës. Po preshevarët, ç’na kenë ? A mos ke harruar, o Muharrem Nitaj, se jo shumë moti, Presheva ishte Kosovë në çdo aspekt ? A mos ke harruar se shqiptarët edhe sot e kësaj dite e konsiderojnë Preshevën, Medvegjën e Bujanovcin si një pjesë të shkëputur me dhunë nga Kosova ? Nuk bëhet fjalë vetëm për një “pëlqim” kur ato troje emërtohen si Kosovë Lindore. Faktet historike flasin se ajo pjesë edhe është Kosovë Lindore. Vetëm Millosheviqët serbo-qetnikë ende e emërtojnë atë pjesë si “Jugu i Serbisë”. Natyrisht, atyre iu bashkëngjitet herë pas herë edhe ndonjë mendjelehtë pseudo-shqiptarë.

Pastaj, edhe po t’i lëmë patriotizmin dhe identitetet menjanë, një gjë duhet të dihet mirë : Kosova është një shtet i lirë. Çdo njeri i botës ka të drejtë të kërkojë shtetësinë e Kosovës, të blejë një pronë për vete dhe të jetojë në Kosovë. Sot e kësaj dite, edhe disa kinezë e kanë marrë nënshtetësinë kosovare, dhe zyrtarisht e faktikisht, janë banorë të Kosovës. Dhe, çka ka të keqe këtu ? Është e drejtë e tyre.

Ndërsa, kur flitet për shqiptarët e Kosovës Lindore, kjo e drejtë për të jetuar në trojet shqiptare, kudo që dëshirojnë ata, nuk mund t’iu mohohet kurrë. Aq më pak në një vend si Kosova, për të cilën shumë trima e burra preshevarë, e konsiderojnë me të drejtë si shtet të vetin. Ndoshta dikush ka harruar, por Kosova Lindore nuk ka harruar kurrë se kush ishte, kush është, dhe cila është rruga e saj e ardhmërisë. Për këtë rrugë, për këtë qëllim, shumë e shumë trima e burra preshevarë e kanë dhënë edhe jetën, duke luftuar me gjak e me mendje, edhe atëherë kur kjo luftë nuk përkrahej nga njerëzit si Muharrem Nitaj, e shumë Muharrem Nitaj tjerë.

Për fund, them se Kosova Lindore, e ndarë administrativisht nga Kosova në vitin 1945 prej komunistëve jugosllav në shkëmbim të komunave në veri të Kosovës, (Leposaviqin dhe Zubinpotokun), shpesh po lihet në mëshirën e askujt, por kjo disi mund të kapërdihet, megjithë faktin se do të duhej të ishte e kundërta. Por, ajo që nuk përtypet fare, është një ide e tillë fobike, siç ishte ideja e shkrimit “Si n’tokë t’babës”.
Nuk thuhet, or Muharrem Nitaj, “Si n‘tokë t’babës”.
Por thuhet “N’tokë t’babës”, sepse Kosova Lindore është një pjesë e Kosovës, e cila dhunshëm po mbahet e ndarë nga tërësia e saj. Kurse, shqiptarët e Kosovës Lindore, janë po aq kosovarë sa edhe shqiptarët e Prishtinës.

Medvegja Forum
22 korrik 2010