Shqiptarët e Medvegjës urojnë Kosovën për zgjedhjen e institucioneve të veta shtetërore

Shqiptarët e Medvegjës urojnë Kosovën për zgjedhjen e institucioneve të veta shtetërore

Medvegjë,Fully,Prishtinë 26 shkurt  2011(medvegja.net)

Siç dihet, me 22 shkurt të këtij viti, pas zgjedhjeve të 12 dhjetorit 2010, Parlamenti i Republikës së Kosovës zgjodhi Behgjet Pacollin për president të Republikës së Kosovës, kurse Hashim Thaqi u rizgjodh kryeministër.
Kjo ngjarje nuk la pa i prekur as shqiptarët që jetojnë anë e mbanë trojeve shqiptare. Edhe shqiptarët e Medvegjës në katër anët e Botës e përcollën me vëmendje procesin e zgjedhjeve të institucioneve shtetërore të Kosovës. Andaj, ata i përcjellin përshëndetjet më të sinqerta vëllazërore presidentit Pacolli, kryeministrit Thaqi, krye-parlamentarit Krasniqi si dhe popullit të Kosovës.

Në një telegram për media të lëshuara nga Unioni Demokratik Shqiptar në Medvegjë, nder te tjera thuhet “Zgjedhje e Behxhet Pacollit President i Kosovës dhe rizgjedhja e Hashim Thaçit kryeministër, është një shpresë e mirë për ne shqiptarët e Medvegjës. Kemi përcjellë me kujdes zhvillimet e fundit që kur ka hyrë Kosova në proces zgjedhor e deri në ditën e sotme të kurorëzimit të krejt këtij procesi, ku populli i Kosovës u dëshmua edhe njëherë se është me kulturë të lartë qytetërimi.’’ Duke vazhduar “Shpresojmë se në bisedimet e ardhshme mes Kosovës dhe Serbisë, të vëni në pah problemet e shumta të grumbulluara për ne shqiptarët e Medvegjës, Bujanocit dhe Preshevës.’’thuhet nder te tjera ne telegramin e urimit të nënshkruar nga Rexhep Abazi ,kryetar i UDSH-së në Medvegjë.

Edhe Diaspora medvegjase me vëmendje të veçantë ka përcjellë çdo proces nëpër të cilin ka kaluar Kosova.
“Z.President, me Ju jemi takuar disa herë, ju keni premtuar, se edhe problemin e Preshevës, Medvegjës dhe Bujanocit, nuk do ta leni anash, do mundoheni, që përmes miqve tuaj ndërkombëtarë që i ke, që edhe këto tre komuna shqiptare, të mos kenë fatin e trishtuar. Presim me padurim, që në të ardhmen, ta vizitosh Medvegjën, Bujanocin dhe Preshevën. Me zemër, urime z.president dhe perendia ju ruajt dhe ju dhashtë shëndet e mbarësi” – thuhet ne telegramin e urimit të nënshkruar nga kryetarët Zenel Neziri dhe Fazli Musliu të shoqatave simotra: Shoqatës “Medvegja” dhe “Lugina e Presheves” me seli ne Zvicër .

Ndërkaq, shqiptarët e Medvegjës të shpërngulur në Kosovë, përmes Shoqatës Kulturore Bamirëse “Medvegja Forum”, kanë uruar popullin e Kosovës për përfundimin me sukses të zgjedhjeve të dhjetorit dhe konsolidimit të institucioneve shtetërore.
“Me të dëgjuar lajmin për formimin e institucioneve të Republikës së Kosovës, shpresa jonë për ngritjen e çështjes së Kosovës Lindore, edhe më tej është rritur. Duke njohur personalitetin dhe të bëmat tuaja për të mirën e kombit shqiptar, ne nuk dyshojmë në angazhimin tuaj të mëtutjeshëm për të mirën e shqiptarëve të Kosovës Lindore” – është urimi i Shoqatës “Medvegja Forum”, drejtuar presidentit Pacolli, kryeministrit Thaqi dhe kryetarit të parlamentit të Kosovës, z. Krasniqi./Zëri i Medvegjës/