U mbajt debati “Si ta rikthejmë librin në jetën tonë-II”

U mbajt debati “Si ta rikthejmë librin në jetën tonë-II”

Presheve,gusht(medvegja.net)

Debati “Si ta rikthejmë librin në jetën tonë – II”, ashtu siç ishte paralajmëruar, u mbajt në lokalet e bibliotekës “Mehmet Jusufi” në Preshevë. Debati filloj në orarin e paraparë, anëtarë të panelit ishin: z. Ferid Selimi, z. Xhahit Ramadani dhe z. Ejup Haziri, moderator Rinor Sadiku.  Fjala iu dha z. Ferid Selimit, i cili ligjëratën e tij e përqendroi në kontekstin semiologjik, konkretisht në rëndësinë e dekodimit të kodeve që ofron libri. Në saje të një dekodimi të tillë njeriu do të arrijë të pasurohet me informata dhe dije, do të formohet intelektualisht dhe tek individi do të lind edhe nevoja për të reflektuar. Në këtë mënyrë ai do të bëhet i dobishëm për veten, rrethin dhe shoqërinë.  Pastaj fjala iu dha z. Xhahit Ramadanit, i cili foli për rëndësinë e librit, duke folur për thëniet e mendimtarëve të rëndësishëm për librin.  Ligjërimin e tij e hapi me thënien e Shekspirit se “Më shumë dua librin se fronin mbretëror”. Ai po foli për metodologjinë e leximit të librit, përmes së cilës rekomandoi se gjatë leximit duhet të nxirren shënime ashtu që të përfitojmë dyfish nga libri. Ligjëratën e tij e përmbylli me porosinë që kurrë libri mos të lihet anash, madje qoftë kjo edhe një faqe brenda ditës.  Në fund iu dha fjala z. Ejup Hazirit, i cili që në fillim ceku rëndësinë e debatit dhe vazhdimësinë e debateve të tilla për ta promovuar librin dhe për të bërë më të afërt me lexuesin.  Ai në mënyrë të përgjithësuar foli për rëndësinë e librit dhe imponimit të tij, individit që në moshën më të re. Ai morri shembullin e Nobelistit turk Orhan Pamuk, i cili deri në moshën 18 vjeçare i kishte lexuar të gjitha librat që i posedonte biblioteka e babait të tij, dhe që sot profesion të vetëm e ka librin. Debatin si  moderator e udhëhoqi Rinor Sadiku, i cili përmes pyetjeve të tij ndaj audiencës dhe panelistëve e bëri debatin më aktiv, çka u vë re  një pjesëmarrje më e theksuar nga ana e audiencës.  Nga audienca u paraqitën alternativa interesante për promovimin e librit. Njëra ndër to ishte reklamimi i librit, kudo që jemi në autobus vende publike etj, në këtë mënyrë rënia në sy e librit do të ngacmonte lexuesit potencial. Po ashtu fushatë për promovimin e librit, që u cek nga audienca, ishte një fushatë e shpërndarjes së posterëve me personalitete të rëndësishme, duke qëndruar me libra në dorë dhe duke porositur, Lexo! Fushatë kjo e cila zhvillohet edhe në ShBA. Ashti si në konkluzionet e debatit të parë por edhe debatit të dytë u ritheksua nevoja e domosdoshme që:

• Prindërit e fëmijëve të merren intensivisht me kultivimin e librit në mjediset e tyre familjare, ashtu ta bëjnë atë të dashur për fëmijët e tyre.
• Mësuesit të merren në mënyrë edhe më intensive më nxënësit, duke iu bërë atyre të dashur librin përmes metodave më efikase. Këtu mund të përfshihen edhe librat me ilustrime.
• Pasurimin e bibliotekave me libra të rinj si dhe largimin e librave të vjetër (ideologjik) në plejadën e librave të cilët punohen gjatë punimeve lekturore nëpër shkolla.
• Nevoja imediate për të ofruar edhe më tepër me veprat e rilindësve shqiptarë, modele personalitetesh për të rinjtë shqiptarë.

KSR shpreh falënderim të përzemërt për të gjithë ata që kontribuan në këtë debat, siç janë: Stafin e bibliotekës “Mehmet Jusufi”, mediat  dhe audiencën.

Klubi i Studiuesve të Rinj-KSR